പൗരധർമ്മവും ഉത്തരവാദിത്വങ്ങളും
പൗരധർമ്മവും ഉത്തരവാദിത്വങ്ങളും
ജനാധിപത്യ ഭരണ സംവിധാനത്തിലെ പ്രധാന പങ്കാളികളാണ് പൗരന്മാർ. ഭരണഘടനയും വിവിധ നിയമങ്ങളും ഓരോ പൗരനും അവകാശങ്ങൾ ഉറപ്പുനൽകുന്നതിനോടൊപ്പം സമൂഹത്തോടും രാഷ്ട്രത്തോടും ചില ഉത്തരവാദിത്വങ്ങളും ചുമതലകളും നിർദ്ദേശിക്കുന്നുണ്ട്. ഈ കടമകൾ ആത്മാർത്ഥമായി പാലിക്കുന്നത് ഉത്തരവാദിത്വമുള്ള ഒരു നല്ല പൗരന്റെ ലക്ഷണമാണ്.
🇮🇳 ഇന്ത്യൻ ഭരണഘടന അനുച്ഛേദം 51A (1976)
- ഭരണഘടനയെയും ദേശീയ പതാകയെയും ദേശീയ ഗാനത്തെയും ആദരിക്കുകയും രാഷ്ട്രത്തിന്റെ അടിസ്ഥാന മൂല്യങ്ങൾ സംരക്ഷിക്കുകയും ചെയ്യുക.
- ദേശീയ സ്വാതന്ത്ര്യ സമരത്തിന്റെ മഹത്തായ ആശയങ്ങളും മൂല്യങ്ങളും പരിപോഷിപ്പിക്കുക.
- പൊതുമുതലുകൾ സംരക്ഷിക്കുകയും അവ നശിപ്പിക്കാതിരിക്കുകയും ചെയ്യുക.
- ചരിത്രപരവും സാംസ്കാരികവുമായ പൈതൃകങ്ങൾ സംരക്ഷിക്കുക.
- പ്രകൃതി വിഭവങ്ങൾ, വനങ്ങൾ, വന്യജീവികൾ, പരിസ്ഥിതി എന്നിവ സംരക്ഷിക്കുകയും പരിപാലിക്കുകയും ചെയ്യുക.
- സ്ത്രീകളുടെ അന്തസ്സും സമത്വവും സംരക്ഷിക്കുകയും സ്ത്രീ വിരുദ്ധ പ്രവർത്തനങ്ങളെ ചെറുക്കുകയും ചെയ്യുക.
- ശാസ്ത്രീയ മനോഭാവവും മാനവികതയും വളർത്തുകയും അന്ധവിശ്വാസങ്ങളെയും അനാചാരങ്ങളെയും എതിർക്കുകയും ചെയ്യുക.
- രാജ്യത്തിന്റെ പരമാധികാരം, ഐക്യം, അഖണ്ഡത എന്നിവ സംരക്ഷിക്കുകയും മതസൗഹാർദ്ദവും സാഹോദര്യവും വളർത്തുകയും ചെയ്യുക.
- രാജ്യസേവനത്തിന് ആവശ്യമായ സാഹചര്യങ്ങളിൽ സന്നദ്ധരാകുക.
🏛 കേരള പഞ്ചായത്ത് രാജ് നിയമം (1994)
കേരള പഞ്ചായത്ത് രാജ് നിയമപ്രകാരം ഗ്രാമപഞ്ചായത്ത് പരിധിയിൽ താമസിക്കുന്ന ഓരോ പൗരനും താഴെ പറയുന്ന സാമൂഹികവും ഭരണപരവുമായ ഉത്തരവാദിത്വങ്ങൾ നിർവഹിക്കേണ്ടതാണ്.
- ഗ്രാമസഭകളിൽ പങ്കെടുത്ത് തദ്ദേശഭരണ പ്രവർത്തനങ്ങളിൽ സജീവ പങ്കാളിയാകുക.
- നികുതികൾ കൃത്യമായി അടച്ച് പഞ്ചായത്തിന്റെ തനത് വരുമാനം ഉറപ്പാക്കുക.
- വികസന പ്രവർത്തനങ്ങളിൽ പഞ്ചായത്തിനെ സാമ്പത്തികമായും ശാരീരികമായും സഹകരിക്കുക.
- ആസൂത്രണം, നിർവഹണം, വിലയിരുത്തൽ എന്നിവയിൽ പങ്കാളിയാകുക.
- പൊതുസ്ഥലങ്ങളിൽ മാലിന്യം നിക്ഷേപിക്കാതിരിക്കുകയും പൊതുശല്യങ്ങൾ ഒഴിവാക്കുകയും ചെയ്യുക.
- ശുചിത്വം, ആരോഗ്യ സംരക്ഷണം, രോഗപ്രതിരോധം, പോഷകാഹാരം, സാക്ഷരത, നിയമബോധവൽക്കരണം എന്നിവയിൽ പഞ്ചായത്തിനെ സഹായിക്കുക.
- സാമൂഹ്യ ഓഡിറ്റ് പ്രക്രിയ വിജയകരമാക്കുന്നതിൽ സഹകരിക്കുക.
- സാമൂഹിക ഐക്യത്തിനും മതസൗഹാർദ്ദത്തിനും സഹായിക്കുന്ന പ്രവർത്തനങ്ങളിൽ പങ്കാളിയാകുക.
- അഴിമതിക്കും ദുർഭരണത്തിനുമെതിരെ ജാഗ്രത പുലർത്തുകയും നിയമപരമായി പ്രതികരിക്കുകയും ചെയ്യുക.
- പ്രകൃതി വിഭവങ്ങളും പൊതുഗതാഗത സംവിധാനങ്ങളും സംരക്ഷിക്കുകയും ദുരുപയോഗം ഒഴിവാക്കുകയും ചെയ്യുക.
- മിതവ്യയം പ്രോത്സാഹിപ്പിക്കുകയും സ്വാശ്രയ പ്രവർത്തനങ്ങളിൽ പങ്കാളിയാകുകയും ചെയ്യുക.
- മദ്യപാനം, മയക്കുമരുന്ന്, സ്ത്രീധനം, സ്ത്രീപീഡനം, ബാലവേല, സാമൂഹിക വിവേചനം തുടങ്ങിയ തിന്മകൾക്കെതിരെ പ്രവർത്തിക്കുക.
- പരിസ്ഥിതി സംരക്ഷണ പ്രവർത്തനങ്ങളിലും ബോധവൽക്കരണ പരിപാടികളിലും പങ്കാളിയാകുക.
- സ്ഥിതിവിവര കണക്കുകൾ ശേഖരിക്കുന്നതിനും കൃത്യമായ വിവരങ്ങൾ നൽകുന്നതിനും സഹകരിക്കുക.
- പ്രകൃതി ദുരന്തബാധിതരെ സഹായിക്കുന്ന പ്രവർത്തനങ്ങളിൽ പങ്കാളിയാകുക.
- സഹകരണ മനോഭാവവും സമ്പാദ്യ ശീലവും വളർത്തുക.
- വികസന പദ്ധതികൾക്കായി ആവശ്യമായ ഭൂമി നിയമാനുസൃതമായി വിട്ടുകൊടുക്കുകയും പൊതുഭൂമി കൈയേറാതിരിക്കുകയും ചെയ്യുക.
- അയൽക്കൂട്ടങ്ങൾ, സ്വയംസഹായ സംഘങ്ങൾ, പരസ്പര സഹായ കൂട്ടായ്മകൾ എന്നിവയിൽ സജീവമായി പ്രവർത്തിക്കുക.
- പൊതുസ്ഥലങ്ങളിൽ തുപ്പൽ, മലമൂത്ര വിസർജനം, പുകവലി, മദ്യപാനം തുടങ്ങിയ സാമൂഹ്യവിരുദ്ധ പ്രവർത്തനങ്ങൾ ഒഴിവാക്കുക.
- മൃഗങ്ങളെ പൊതുസ്ഥലത്ത് കശാപ്പ് ചെയ്യാതിരിക്കുകയും മാംസാവശിഷ്ടങ്ങൾ പൊതുസ്ഥലത്ത് പ്രദർശിപ്പിക്കാതിരിക്കുകയും ചെയ്യുക.
- വളർത്തുമൃഗങ്ങൾക്കും പക്ഷികൾക്കും ആവശ്യമായ കുത്തിവയ്പ്പുകളും ലൈസൻസും ഉറപ്പാക്കുക.
- നിയമങ്ങളും ചട്ടങ്ങളും പാലിക്കുകയും നിയമലംഘനങ്ങൾക്ക് പ്രേരണ നൽകാതിരിക്കുകയും ചെയ്യുക.
- സ്ത്രീ-പുരുഷ സമത്വവും സാമൂഹ്യനീതിയും ഉറപ്പാക്കുന്ന പ്രവർത്തനങ്ങളിൽ പങ്കാളിയാകുക.